Բարձր ինտենսիվությամբ ինտերվալային մարզումների (HIIT) առավելությունները
Յուրաքանչյուրիս մոտ նախևառաջ առաջանում է հետևյալ հարցը, թե ինչ են իրենցից ներկայացնում բարձր ինտենսիվությամբ ինտերվալային մարզումները և ինչու պետք է դրանք դառնան մեր հիմնական մարզումների պարտադիր մասը։ Բարձր ինտենսիվությամբ ինտերվալային մարզում կարող է համարվել ցանկացած տեսակի մարզում, երբ ակտիվության ողջ ընթացքում բարձր ինտենսիվությունը ֆիքսված ժամանակահատվածում պարբերաբար փոխարինվում է նվազ ինտենսիվությամբ կամ նույնիսկ լիակատար հանգստով:

Սկսնակների համար լավագույն օրինակ կարող է ծառայել 1 րոպե շատ արագ վազքը և դրան հաջորդող 2 րոպե քայլքը։ Վերոնշյալ 3-րոպե տևողությամբ ինտերվալը պետք է կրկնել 5 անգամ 15 րոպե տևողությամբ ճարպը այրող մարզման իրականացման համար։ Թվում է չափից շատ հեշտ արդյունավետ լինելու համար, սակայն գիտությունը չի չափազանցնում իրականությունը։

Այսպիսով, ստորև ներկայացնում ենք HIIT-ի կարևոր առավելությունները (տվյալ հոդվածում բարձր ինտենսիվությամբ ինտերվալային մարզումները պայմանականորեն կնշանակենք միջազգային հապավմամբ` HIIT (High Intensity Interval Training)) ․

HIIT-ը գերարդյունավետ է և այն իդեալական է զբաղված օրակարգի հետ համատեղման համար։ Ուսումնասիրությունները ցույց են տվել, որ հնարավոր է ստանալ առավել մեծ արդյունավետություն 15 րոպե ինտերվալային մարզումներով շաբաթական 3 անգամ զբաղվելիս, քան 1 ժամ դանդաղ վազքի ժամանակ։ 2011 թվականին իրականացված ուսումնասիրության համաձայն 2 շաբաթ HIIT-ով զբաղվելը ավելի լավ է զարգացնում աէրոբիկ հնարավորությունները, քան 6-8 շաբաթ տևողությամբ դիմացկունությանն ուղղված մարզումները։

HIIT-ը ոչ միայն օգնում է այրել կալորիաներ ընթացքում, այլ նաև նպաստում է մարմնի ակտիվ վերականգնմանը մարզումներին հաջորդող 24 ժամվա ընթացքում։ Վազքը, հեծանվավազքը, պարանով ցատկը և նմանատիպ այլ մարզումները շատ լավ տարբերակ կարող են լինել HIIT-ի համար, բայց առավելությունն այն է, որ կարիք չկա կիրառել որևէ տեսակի սարքավորում։ Անգամ ծանրաձողերի կիրառումն այստեղ կխոչընդոտի արդյունավետությանը, քանի որ HIIT-ի ընթացում կարևոր է ծանրաբեռնել և բարձրացնել սրտի աշխատանքի ցուցանիշը, այլ ոչ թե որևէ մկանային խմբի։ Մեզնից շատերն, ովքեր փորձել են նվազեցնել իրենց քաշը, բախվել են միևնույն խնդրին․ քաշի նվազումը պայմանավորված է եղել մկանային զանգվածի նվազմամբ, իսկ HIIT-ի և ուժային մարզումների համատեղման դեպքում դուք չեք կորցնի այդքան դժվար ձեռքբերված մկանային զանգվածը և միևնույն ժամանակ կկորցնեք անցանկալի ճարպային զանգվածը։

HIIT-ը ոչ միայն նպաստում է ճարպի այրմանը և մկանային զանգվածի պահպանմանը, այլ նաև աճի հորմոնի(պատասխանատու է ոչ միայն աճի և կալորիանների այրման համար, այլև դանդաղեցնում է ծերացման գործընթացը, օգնում մնալ երիտասարդ) արտադրմանը մարզմանը հաջորդող 24 ժամվա ընթացքում։

HIIT-ով հնարավոր է զբաղվել ամենուր, որտեղ ձեզ հարմար է և ցանկացած պահի, քանի որ այն չունի հստակ պահանջներ տեղի, ժամանակի և սարքավորումների կիրառման համար։ Այսպիսով, այն իր բնույթով շատ պարզ է և մատչելի յուրաքանչյուրի համար։

HIIT-ի ընթացքում դուք չեք կարող գիրք կարդալ կամ օնլայն հաղորդակցվել ձեր ընկերների հետ, քանի որ այն տևում է շատ կարճ և պահանջում է մեծ աշխատանք ողջ ընթացքում, բայց միևնույն ժամանակ այն ապահովում է բազմազանություն, արագ և ցանկալի արդյունք։

HIIT-ը կօգնի ձեզ ունենալ առողջ և գեղեցիկ մարմին և անպայման կդառնա ձեր ամենասիրելի մարզումներից մեկը։ 

Նյութը պատրաստեց Հռիփսիմե Մկրտչյանը