Իտալացի երիտասարդ ակորդեոնահարին Հայաստան էր հրավիրել Հայաստանի երիտասարդական նվագախումբը: Համատեղ փորձերի ժամանակ նրանք շատ չեն ունեցել, բայց քանի որ երաժշտության լեզուն համաշխարհային է, հեշտ են հասկացել ու կարողացան հանդիսականին մատուցել տանգոյի ու դասականի ոգին:

Համատեղ համերգի նախաձեռնությունն ինքնին համարձակ քայլ էր, քանի որ ակորդեոնի ու բանդեոնի հնչյուններն առաջին հայացքից այնքան էլ համադրելի չեն: Սակայն Մարիո Ստեֆանո անունով տաղանդավոր երիտասարդն ապացուցեց, որ Պիացոլլան կարող է հնչել նաեւ սիմֆոնիկ նվագախմբի կատարմամբ:

Համերգային ծրագրում միայն Պիացոլլա ու տանգո չէր ընդգրկված. հնչեցին նաեւ Կոնոչիելլայի եւ Մոլինելլիի ստեղծագործությունները: Հանդիսատեսը երիտասարդ իտալացուն ջերմությամբ ընդունեց: Պակաս ջերմ ու հուզված չէր նաեւ ինքը` Մարիո Ստեֆանոն, ով ի պատասխան իր «սիրտն էր ուղարկում» ներկաներին:

Մարիո Ստեֆանոն հանդիսատեսին անակնկալ ուներ պատրաստած: Երիտասարդական նվագախմբի հետ համերգին նա ներկայացրեց նաեւ իր երաժիշտ ընկերներից մեկին` նույնպես իտալացի, կիթառահար Լուկա Լուչինիին:

«Ես ուրախ եմ, որ մեր քաղաքում այսպիսի համերգներ են տեղի ունենում, ու ավելի ուրախ եմ, որ դահլիճը լեփ-լեցուն եմ տեսնում: Ճիշտ է, ես ինձ տանգոյի կամ Պիացոլլայի երկրպագու չեմ համարում, բայց միշտ էլ կարելի է նոր բան լսել ու նորովի լսել»,- համերգից հետո իր տպավորություններն է կիսում 28-ամյա Նորա Գաբրիելյանը:

Ջուլիետ Առուշանյան

Պատկերասրահ` Մարիո Ստեֆանո Պիետրոդարկիի համերգը Երեւանում