Նյութը՝ Թամարա Գասպարյանի
Լուսանկարները՝ Լուսի Սարգսյանի
Տեղադրվել է 05-04-2017
Վահրամ Միրաքյանը՝ գրքի խորհրդատու
«Բյուրոկրատ» գրախանութում արդեն 6-րդ անգամ այցելուներին սպասարկում են գրականության նկատմամբ մեծ հետաքրքրություն ունեցող եւ ճանաչված մարդիկ։

Գրքի խորհրդատու եղավ նաեւ բանասիրական գիտությունների թեկնածու, 4 մենագրության («Լրատվամիջոցների ազդեցության հնարավորությունները», «Ագրեսիվ հեռուստատեսության հետեւանքները», «Սոցիալական դիրքորոշումների ձեւավորումը ԶԼՄ-ների միջոցով», «Չոր մարքեթինգ») եւ մոտ քսան գիտական հոդվածների հեղինակ, «Չոր մարքեթինգ» կուրսի հիմնադիր Վահրամ Միրաքյանը, ում հետ զրուցել ենք ընթերցանության, նախընտրած գրքերի մասին: 

- «Չոր մարքեթինգ» գիրքը գիտական աշխատանք չէ, սակայն մեծ տարածում գտավ: Ձեր կարծիքով` ինչո՞վ էր պայմանավորված նմանօրինակ հաջողությունը:

- Պրակտիկությամբ եւ օգտակարությամբ: Գիտական աշխատանքները միշտ նեղ շրջանակին են հետաքրքրում: Բնականաբար, դրանք համապատասխան արձագանք են գտնում, իսկ այստեղ զուտ պրակտիկ գործիքներ են: Ինձ թվում է` դա է պատճառը, որ տարածվեց:

- Ո՞ւմ համար է այն նախատեսված:

- Այն մարդու, ով ուզում է բիզնես հիմնել, մտածում է բիզնեսի մասին, եւ այն մարդու, ով ունի բիզնես, բայց ուզում է փոփոխություններ ու թարմացում:

- Այսօր ի՞նչ գրքեր եք խորհուրդ տալու այցելուներին:

- Այն գրքերը, որոնք կարդացել եմ եւ հավանել, այն հեղինակներին, որոնց ճանաչում եմ: Առաջին հերթին խորհուրդ կտամ Մաննի «Առանց բյուջեի» գիրքը, Նասսիմ Նիկոլաս Թալեբի «Սեւ կարապը», սքրամի թեմայով գրքեր: Բացի դրանցից՝ կան հրատարակչություններ, որոնց գրքերը վստահաբար լավն են: Ըստ այդ հրատարակչությունների էլ եմ երբեմն կողմնորոշվում. հրատարակչություններ կան, որ միշտ զտում են լավ գրքերը: Երբ անծանոթ հեղինակի եմ հանդիպում, ըստ հրատարակչության եմ կողմնորոշվում:

- Ձեր կյանքում ի՞նչ տեղ ունի ընթերցանությունը:

- Տեխնիկայի ժամանակաշրջանում ենք ապրում: Տեխնիկան ժամանակ առ ժամանակ «update» է լինում, ամեն ինչ` ծրագրերը, հավելվածները եւ այլն: Այդ թարմացումներից հետո սկսում են ավելի լավ աշխատել, նոր գործառույթներ ավելանալ: Գիրք կարդալն ինձ համար դա է մոտավորապես: Երբեմն լինում է՝ «update»-ից հետո առանձնապես բան չի փոխվում, լինում է, որ հետաքրքիր գաղափարներ են առաջանում, ինչ-որ բան է փոխվում: Ցավոք սրտի, ես հազիվ հասցնում եմ ամսվա մեջ մեկ գիրք կարդալ, բայց ամիսը գոնե երկու գիրք պետք է փորձել ավարտել: Մասնագիտական գրքեր կարդալը կօգնի առաջ գնալ, ոչ թե մնալ ու լճանալ:

- Կա՞ մի գիրք, որ Ձեր կյանքը կամ մտածելակերպը փոխել է:

- Միշտ են այդպիսի գրքեր լինում: Ես էլ երբեմն մտածում եմ այդ մասին, բայց կոնկրետ չեմ հիշում: Վերջերս ինձ շատ դուր եկավ «Зло маркетинга»-ն: Այցելուներին կառաջարկեմ այդ գիրքը: Վերջին 3-4 ամիսներին կարդացածս ամենահետաքրքիր գիրքն է: Ամենաթարմ գիրքը, որը մեկ շաբաթ առաջ եմ վերցրել, Scrum մենեջմենթի գործիքի մասին գիրքն է, որն էլի բան փոխեց. մենեջմենթը սկսեցի դրա հիման վրա կազմակերպել:

- Ինչպիսի՞ անձնական գրադարան ունեք:

- Մեծ, երեւի 1000-ից ավելի գրքից բաղկացած գրադարան ունեմ: Հիմնականում մեդիաազդեցության թեմայով շատ գրքեր ունեմ, որովհետեւ թեկնածուականս այդ գծով եմ պաշտպանել: Բնականաբար, ունեմ նաեւ այն գրքերը, որ ուսանողական տարիներին հանձնարարում էին, իսկ վերջին 4-5 տարիների ընթացքում գրադարանս համալրել եմ հիմնականում բիզնեսին վերաբերող գրքերով: Այսպիսով՝ մեդիաազդեցություն, հոգեբանություն, բիզնես:

- Սովորաբար որտե՞ղ եք սիրում կարդալ:

- Տանը:

- Կան մարդիկ, ովքեր միաժամանակ մի քանի գիրք են կարդում: Դուք այդպես վարվո՞ւմ եք:

- Այս պահին այդպես չեմ կարդում, բայց ժամանակ է եղել, որ մի քանի ուղղությամբ խորանալու անհրաժեշտությամբ պայմանավորված՝ ստիպված եմ եղել մի քանի բան կարդալ: Գեղարվեստական գրականություն վաղուց չեմ կարդում: Երեւի 2000-ականների կեսերից գեղարվեստական գիրք չեմ կարդացել: Կարդում եմ մասնագիտական: Գեղարվեստական գիրք կարդում են հաճույքի համար, իսկ հաճույքի համար ժամանակ չկա. աշխատել է պետք:

- Ավագ սերունդը հաճախ է դժգոհում, որ երիտասարդները չեն սիրում կարդալ: Դուք ի՞նչ կարծիքի եք:

- Ես էլ եմ համաձայն: Սուբյեկտիվ տպավորություն է, բնականաբար, բայց կարծում եմ, որ աստիճանաբար դժվարանում է կարդալը, որովհետեւ այս գաջեթները, որ մեզ համատարած շրջապատում են, մեզ սովորեցնում են կարճ տեքստերի, նկարների ու տեսանյութերի: Մարդ արդեն չի կարողանում երկար տեքստեր կարդալ եւ կենտրոնանալ: Այդ խնդիրը ես ունեմ ու միշտ պայքարում եմ դրա դեմ, շատ բարդ է, չեմ կարողանում կենտրոնանալ, «Ֆեյսբուք»-ի, «Վայբեր»-ի, «Ուոթսափ»-ի ամեն ազդանշանից շեղվում ես, ուզում ես իմանալ՝ ինչ է կատարվում: Այդպիսի խնդիրներ կան, ու նոր սերունդն ավելի շատ է խորացած այդ խնդիրներում, այդ պատճառով իրենց համար ավելի բարդ է: Գաջեթների գայթակղությունը մեծ է, գիրքն այդ մրցակցությանը երբեմն ուղղակի չի դիմանում:

- Իսկ ի՞նչ լուծում կառաջարկեք:

- Ճիշտն ասած, դժվարանում եմ պատասխանել: Ես, օրինակ, օգտագործում եմ «Pomodoro» հավելվածը. 25 րոպե կարդում եմ, հետո՝ ընդմիջում:

Հ.Գ.: Նախորդ շաբաթներին գրքի խորհրդատու են եղել հաղորդավար, հումորիստ Նարեկ Մարգարյանը, գրողներ Արամ Պաչյանն ու Հասմիկ Սիմոնյանը, մեդիափորձագետ Սամվել Մարտիրոսյանը, դերասան Սամվել Թադեւոսյանը: Նախաձեռնության նպատակը ճանաչված անձանց միջոցով երիտասարդների ուշադրությունը գրքի ու գրականության վրա սեւեռելն է: