Նյութը՝ ԱՐՄԵՆՊՐԵՍ լրատվական գործակալության
Լուսանկարները՝ ԱՐՄԵՆՊՐԵՍ լրատվական գործակալության
Տեղադրվել է 2020-12-10 17:52
ՖԻԼՀԱՐՄՈՆԻԿ ՆՎԱԳԱԽՈՒՄԲԸ ՄԻՆՉԵՎ ՏԱՐԵՎԵՐՋ ԵՐԿՈՒ ՀԱՄԵՐԳ ԿՆՎԻՐԻ ԲԵԹՀՈՎԵՆԻ 250- ԱՄՅԱԿԻՆ
«Ուխտագնացություն դեպի Բեթհովեն» փառատոնի շրջանակում, որը նվիրված է Լյուդվիգ վան Բեթհովենի 250-ամյակին, Հայաստանի ազգային ֆիլհարմոնիկ նվագախումբը դեկտեմբերի 16-17-ին հանդես կգա համերգներով:

Աշխարհահռչակ կոմպոզիտորի ծննդյան օրը՝ դեկտեմբերի 16-ին, Արամ Խաչատրյան համերգասրահում նվագախումբը կհնչեցնի Բեթհովենի թիվ 5 և 6 սիմֆոնիաները, իսկ դեկտեմբերի 17-ին՝ թիվ 1 և 4 սիմֆոնիաները:

Լրագրողների հետ հանդիպմանը Ֆիլհարմոնիկի գեղարվեստական ղեկավար և գլխավոր դիրիժոր Էդուարդ Թոփչյանն ասաց, որ փառատոնին մի շարք համերգներ և այլ միջոցառումներ են նախատեսված եղել, որոնք համավարակի պատճառով չեղարկվել են:

«Տարօրինակ է նման բան ասելը, բայց Բեթհովենի 250-ամյակը տեղափոխվում է հաջորդ տարի: Շատ երկրներում անգամ 2021-ին համերգային ծրագրերը դադարեցված են: Հուսանք՝ մեր երկրում այդպես չի լինի և կկարողանանք հյուրընկալել գոնե 400 հանդիսատեսի»,-ասաց Թոփչյանը:

Նա շեշտեց, որ իր Բեթհովենը կոմպոզիտորի ժամանակաշրջանի և մոդեռն ավանդույթների սինթեզն է:

«Ուխտագնացություն դեպի Բեթհովեն» փառատոնն իրականացնում է Հայաստանի ազգային ֆիլհարմոնիկ նվագախումբը՝ ՀՀ կրթության, գիտության, մշակույթի և սպորտի նախարարության աջակցությամբ: