«Երեխաներից սովորում եմ ապրել ներկայի մեջ»․ Աստղիկ Հարությունյանը «խոխա» արշավներ է կազմակերպում

  21 December 2021  336 view
«Երեխաներից սովորում եմ ապրել ներկայի մեջ»․ Աստղիկ Հարությունյանը «խոխա» արշավներ է կազմակերպում

Երեխաներին պետք է մոտեցնել բնությանը, սովորեցնել հարգել ու վայելել այն։ Այս նպատակով 2020թ․–ի օգոստոսից Աստղիկ Հարությունյանը երեխաներին լեռներ, կիրճեր ու անտառներ է տանում։ «Խոխա» արշավները նրա «Արի» արշավական ակումբի մասն են դարձել։ «Երեխաների հետ սովորում ես համբերատար լինել, չքննադատել, չպիտակավորել։ Իրենք բացառիկ հատկություն ունեն՝ սովորեցնում են քեզ ապրել ներկայի մեջ ու վայելել պահը», – ասում է Աստղիկը։

«Արի» արշավներ

2020թ․–ի մայիսին հիմնեցի «Արի» արշավական ակումբը, որի գաղափարը վաղուց ունեի։ Զբոսավար եմ ու միշտ ցանկացել եմ մարդկանց «ուրիշ Հայաստանը» ցույց տալու հնարավորություն ունենալ։ Նկատի ունեմ՝ ոչ միայն զբոսաշրջային հայտնի վայրերը։ Կորոնավիրուսի համավարակով պայմանավորված լոքդաունի ընթացքում սկսեցի ինքս արշավներ գնալ, հետո քիչ–քիչ հետս տանել ընկերներիս։ Հենց նրենք ինձ խորհուրդ տվեցին՝ ինչո՞ւ չես ուզում այլ մարդկանց էլ տանել։ Ֆեյսբուքյան էջում գրառում արեցի ու կազմակերպեցի առաջին արշավս՝ 15 մարդու մասնակցությամբ։