Ուզում եմ բոլորի երազանքները կատարվեն առանց աստղաթափերի. Ամալյա Սողոմոնյան

  25 February 2021  346 view
Ուզում եմ բոլորի երազանքները կատարվեն առանց աստղաթափերի. Ամալյա Սողոմոնյան

Լեզվաբան, դասախոս, գրականագետ, գրող Ամալյա Սողոմոնյանն իր փոքրիկ էտյուդներում ամփոփում է մի ամբողջ ասելիք։

Erit.am-ը «Աստղաթափ»-ի և գրական ձևաչափի մասին զրուցել է գրողի հետ։

– Ամալյա, ի սկզբանե ստացել եք լեզվաբանի կրթություն, ինչո՞ւ հետո որոշեցիք շարունակել ուսումը արտասահմանյան գրականության բաժնում:
– Իրականում շատ դժվար էր որոշում կայացնելը: Ես չեմ թողել լեզվաբանությունը: Նաև անգլերեն եմ դասավանդում: Իսկ արտասահմանյան գրականության ամբիոնում հայտնվելը երազանքներիցս մեկն էր, որը պիտի իրականացնեի:

– Գրականագետից գրող դառնալու ճանապարհը հեռու չէր, սակայն մինչ գրելը ի՞նչ գործունեությամբ էիք զբաղված:
– Գրելու համար պարտադիր չէ հայտնվել գրականության բաժնում, իսկ լավ գրականագետ դառնալու համար դեռ երկար ճանապարհ ունեմ անցնելու:

– Ձեր հարցազրույցներից մեկում ասել եք, որ գրքեր գրում են մարդիկ, որոնք շատ են կարդում, և մարդիկ, որոնք տաղանդավոր են: Հիմա էլ եք այդ կարծիքի՞ն, և եթե այո, ապա ո՞ր խմբին եք պատկանում Դուք:
– Չէ, տաղանդավոր չեմ, ուղղակի գրելով հանգստանում եմ, փորձում խաղաղվել: Գիրք կարդալն էլ աշխարհից կտրվելու ամենակարճ ու արդյունավետ մեթոդն է:

– Ինչպե՞ս դրվեցին Ձեր գրական գործունեության հիմքերը:
– Հիմքերը գրական թերթերում ու ամսագրերում են, բայց դեռ շատ անելիք կա, իսկ իրական մոտիվացիան ընթերցողի կարծիքն է:

– Շատ գրողներ ասում են, որ ամենալավ ժամը գրելու համար ուշ երեկոն է, ո՞րն է Ձեր աշխատելու ժամանակը:
– Գիշերը, երբ Մարին քնած է:

– Կա՞ն գրողներ, որոնք Ձեզ վրա ազդեցություն են թողել և ինչ-որ ձևով նպաստել, որպեսզի Դուք էլ սկսեք գրել:
– Գրելու տեխնիկայի վրա գուցե ազդեցություններ կան, բայց փորձում եմ վանել բոլոր տեսակի ազդեցություններն ու տողերում միայն ինձ թողնել:

– Ձեր գործերի առանցքում սերն է ...
– Մեր բոլորի կյանքի առանցքում սերն է:

– Ինչո՞ւ «Աստղաթափ»:
– Ուզում եմ բոլորի երազանքները կատարվեն առանց աստղաթափերի:

– Գրքի կերպարները հորինված են, թե՞ իրականում գոյություն ունեն:
– Բոլորն իրական են, ապրված:

– Սեփական փորձն ու խոհերն եք ամփոփե՞լ գրքում:
– Էտյուդները տարբեր մարդկանց մասին են: Շատ հաճախ մենք մարդկանց հորինում ենք, դարձնում այնպիսին, ինչպիսին կցանկանայինք տեսնել, իսկ վերջում հիասթափվում ենք:

– Գրում եք էտյուդներ, կգա՞ ժամանակ, երբ կանցնեք այլ ձևաչափի:
– Չեմ սիրում երկար տեքստեր, ասելիքը պիտի պարզ ու լակոնիկ լինի, չձանձրացնի ընթերցողին:

– Ձեր ընթերցողները սպասե՞ն նոր գրքի:
– Սպասումն այնքան էլ հաճելի զգացում չի:

Զրույցը՝ Սվետլանա Դավթյանի

In topic