6 նպատակ՝ երիտասարդների կյանքն ավելի լավը դարձնելու համար

  26 February 2021  254 view
6 նպատակ՝ երիտասարդների կյանքն ավելի լավը դարձնելու համար

Լրամշակվում է Երիտասարդական պետական քաղաքականության 2021-2025 թթ. ռազմավարության նախագիծը

Այսօր՝ փետրվարի 26-ին, Աղվերանում մեկնարկեց երկօրյա աշխատաժողով։  Պետական գերատեսչությունների, ինչպես նաև շահագրգիռ տեղական և միջազգային կազմակերպությունների ներկայացուցիչները, երիտասարդական ոլորտի աշխատողներն ու փորձագետները հավաքվել են լրամշակելու Երիտասարդական պետական քաղաքականության 2021-2025 թթ. ռազմավարության նախագիծը։

Նախագծի շուրջ աշխատանքները մեկնարկել են դեռ անցած տարի։ Համավարակով և պատերազմով պայմանավորված՝ ընթացքը մի փոքր դանդաղել էր և իրականացվում էր առցանց։ Առաջիկա օրերին աշխատանքային խմբի անդամները հնարավորություն կունենան մանրամասն քննարկել նախագիծը, գործողությունների ծրագիրն ու առաջարկների փաթեթը։

«Երիտասարդների համար հնարավորությունների ստեղծումն ու ընդլայնումը միայն պետական քաղաքականության արդյունք չէ։ Կան կառույցներ, աշխատանքը տարվում է։ Այս ռազմավարության դերը հաջորդ տարիների համար ուղենիշեր սահմանելն է, որոնք կողմնորոշիչ կլինեն և դաշտում աշխատող կառույցների համար, և մեզ համար որպես՝ լիազոր մարմին, և զարգացման գործընկերների համար։

Իհարկե մենք պիտի հաշվի առնենք երիտասարդության ոլորտի դասական խնդիրները, ինչպես օրինակ՝ մարզերում երիտասարդական կյանքի աշխուժացումը կամ ներուժի բացահայտման, իրացման, հանրային կյանքի տարբեր ոլորտներում մասնակցության հնարավորությունների ընդլայնումը, ինչն, իմ կարծիքով, մարտահրավեր է եղել ոչ միայն նախընթաց տարիներին, այլև տասնամյակներին։ Եվ իհարկե այնպիսի մարտահրավերներ, որոնք առաջ են եկել արդեն պատերազմի և համավարակի հետևանքով։ Այդ բոլոր մարտահրավերները հաշվի առնելով էլ պետք է կազմենք այս ռազմավարությունը»,- նշեց Կրթության, գիտության, մշակույթի և սպորտի փոխնախարար Արթուր Մարտիրոսյանը։

Փոխնախարարը տեղեկացրեց, որ շահագրգիռ կառույցներն իրենց ներդրումն են ունենալու ոչ միայն ռազմավարության մշակման, այլև իրականացման գործում․ գործողությունների պլանում ներառված մի շարք ծրագրեր ֆինանսավորվելու են այդ կառույցների կողմից։

Երիտասարդական պետական քաղաքականության 2021-2025 թթ. ռազմավարության նախագիծը մշակվել է հետազոտական տվյալների հիման վրա՝ հաշվի առնելով նաև նախորդ՝ 2013-2017 թթ. ռազմավարության վերլուծության և գնահատման արդյունքները։

Երիտասարդական ոլորտի համակարգում և զարգացում, ակտիվ քաղաքացիություն, տնտեսական մասնակցություն, առողջ և ներառված երիտասարդներ, երիտասարդական աշխատանք և կամավորություն, միջազգային գործընկերություն․․․ սրանք այն 6 նպատակներն են, որոնք նախարարությունը սահմանել է 2021-25 թթ.-ի համար՝ որպես գերակա ուղղություններ։

«Երիտասարդության ոլորտի համակարգումը մինչ այս որևէ ռազմավարությունում ներառված չի եղել։ Ամեն կազմակերպություն իր մանդատի շրջանակներում իրականացրել է իր ծրագրերը։ Հիմա մենք ուզում ենք, որ դա լինի համակարգված և նախարարության ռազմավարությանը համահունչ, ինչը շատ կարևոր է»,- մեզ հետ զրույցում ընդգծեց ԿԳՄՍ նախարարության Երիտասարդական քաղաքականության, լրացուցիչ և շարունակական կրթության վարչության պետի պարտականությունները կատարող Արմենուհի Պետրոսյանը։

Քաղաքացիական, ոչ ֆորմալ կրթություն, կամավորություն։ ԿԱԶԱ հիմնադրամի քաղաքացիական կրթության ծրագրերի ղեկավար Վահրամ Պետրոսյանը նախարարության հետ համագործակցության լայն շրջանակ է տեսնում։ Ասում է՝ պետք է ճիշտ գնահատենք համավարակի և պատերազմի ազդեցությունները, դասեր քաղենք՝ ինտենսիվ կերպով օգտագործելով գիտության և տեխնոլոգիաների հնարավորությունները, զարգացնելով ոչ ֆորմալ կրթությունը։

«Կարևոր է ոչ միայն ոչ ֆորմալ կրթությունը, այլև այն, որ ՀՀ-ում ունենանք ոչ ֆորմալ կրթության զարգացմանը նպաստող միջավայր, որ սահմանամերձ գյուղերի երիտասարդները ևս կարողանան լիարժեքորեն օգտվել ոչ ֆորմալ կրթության հնարավորություններից։

Մեծ քաղաքներում հնարավորությունները մեծ են, գյուղերում՝ փոքր։ Պետք է շտկել դա այնպես, որ հնարավորությունները հավասար լինեն։ Սա կարևոր է նաև գործիքակազմի առումով․ հնարավորություն կունենանք երիտասարդների համար իրենց զարգացմանը համահունչ գործիքներ կիրառել»,- Erit.am-ի հետ զրույցում նշեց Վահրամ Պետրոսյանը։