Ո՞ր մարզաձևն է համապատասխանում հենց ձեզ

  23 Նոյեմբեր 2021  91 դիտում
Ո՞ր մարզաձևն է համապատասխանում հենց ձեզ

Ոմանք սիրում են վազել, ոմանք՝ լողալ, իսկ մյուսները նախընտրում են հեծանվասպորտը։ Որպեսզի ֆիզիկական ակտիվությունն իսկապես օգտակար լինի, կարևոր է գտնել հենց ձեր սպորտը: Բացատրենք, թե ինչպես դա անել:

Ֆիզիկական ակտիվության տեսակն ընտրելիս պետք է նկատի ունենալ ոչ միայն տվյալ մարզաձևի նկատմամբ սերը, այլև դրա համապատասխանությունը ֆիզիկական և էմոցիոնալ վիճակին։ Նախ կարևոր է հասկանալ, թե այժմ ինչ վիճակում է ձեր մարմինը և ինչի կարիք ունի: Կախված չափահասի ամենօրյա ինքնազգացողությունից՝ բժիշկները ըստ առողջական վիճակի մարդկանց բաժանում են երեք խմբի։ 

Եթե չունեք քրոնիկ հիվանդություններ և հազվադեպ եք վատ զգում, ամենայն հավանականությամբ, առաջին խմբի ներկայացուցիչ եք։ Ամեն դեպքում, պետք է նկատի ունենալ, որ առողջական գանգատների բացակայությունը միշտ չէ, որ լավ մարզավիճակի ապացույց է։ Անհրաժեշտ է պարբերաբար բուժզննում անցնել, որը կհաստատի, որ դուք լիովին առողջ եք։ Երկրորդ խմբի մարդկանց բնորոշ են քրոնիկ հիվանդությունները, բայց դրանք չեն սահմանափակում նրանց ֆիզիկական ակտիվությունը: Երրորդ խմբին բնորոշ են առողջական վատ վիճակը, ֆիզիկական ակտիվությունը սահմանափակող քրոնիկ հիվանդությունները, հաճախակի այցելությունները բժշկին և դեղորայքի մշտական ընդունումը: Եթե ​​դուք երրորդ խմբից եք, ձեզ հարկավոր է մարզումների հատուկ ռեժիմ:

Կախված առողջական վիճակից՝ բժիշկները խորհուրդ են տալիս սպորտով զբաղվել տարբեր հաճախականությամբ։ Մենք ընտրել ենք ֆիզիկական ակտիվության տարբեր տեսակներ, որոնք հարմար են գրեթե բոլորի համար:

Արաք քայլք

Առաջին և երկրորդ խմբեր՝ 45 րոպեից մինչև 1 ժամ, շաբաթական 2 անգամ։

Երրորդ խումբ՝ օրական 30 րոպե։

Ազդեցությունը՝ պահպանում է կապանների և ջլերի առաձգականությունը, աստիճանաբար ամրացնում է սրտի մկանները, կանխում է սրտի հիվանդությունները, բարելավում է ոտքերի առողջությունը։

Վազք 

Առաջին և երկրորդ խմբեր՝ 45 րոպեից մինչև 1 ժամ, շաբաթական 2 անգամ։

Երրորդ խումբ՝ խորհուրդ չի տրվում:

Ազդեցությունը՝ մարզում է շնչառական համակարգը և բարելավում սրտանոթային համակարգի աշխատանքը: Ժամանակի ընթացքում մարմինն ազատվում է «թուլությունից»։

Չմշկավազք

Առաջին խումբ՝ շաբաթական 3 անգամ, 2-3 ժամ ։

Երկրորդ խումբ՝ շաբաթական 3 անգամ, 1 ժամ։

Երրորդ խումբ՝ շաբաթական 2-3 անգամ, 20 րոպե (մոտ 5 կմ)։

Ազդեցությունը՝ բարելավում է սրտի, հոդերի աշխատանքը, սակայն մարզվելուց առաջ անհրաժեշտ է կատարել նախավարժանք։ Չմշկավազքը թույլ է տալիս նվազեցնել ազդրերի ծավալը և բարելավել դրանց ձևը, զգալիորեն ամրացնել սրունքների և հետույքի մկանները։ Մարզումները ազդում են նաև ուսագոտու մկանների վրա՝ շարժման մեջ հավասարակշռության անհրաժեշտության պատճառով:

Հեծանվասպորտ

Առաջին խումբ՝ շաբաթական 2-3 անգամ, 1,5 ժամ։

Երկրորդ խումբ՝ շաբաթական 2 անգամ, 1 ժամ։

Երրորդ խումբ՝ շաբաթական 1-3 անգամ, 30 րոպե։

Ազդեցությունը՝ բարելավում է կապանների և հոդերի ընդհանուր վիճակը՝ մեծացնելով արյան շրջանառությունը հյուսվածքներում, դանդաղեցնում է թոքերի ծերացման գործընթացը, ամրացնում հետույքի, ազդրերի քառագլուխ և մեջքի ստորին հատվածը պահող մկանները։

Լող

Առաջին խումբ՝ շաբաթական 3 անգամ, 1 ժամ։

Երկրորդ խումբ՝ շաբաթական 2-3 անգամ, 45 րոպե։

Երրորդ խումբ՝ շաբաթական 1-2 անգամ, 20 րոպե։

Ազդեցությունը՝ բարելավում է արյան շրջանառությունը դեպի սիրտ, հոդերի շարժունակությունը՝ առանց դրանք լարելու, աստիճանաբար և հավասարաչափ ամրացնում է բոլոր մկանները՝ մարմնին տալով ներդաշնակ ձև:

Թենիս

Առաջին խումբ՝ շաբաթական 2-3 անգամ, 1 ժամ։

Երկրորդ խումբ՝ շաբաթական 2 անգամ, 45 րոպե։

Երրորդ խումբ՝ խորհուրդ չի տրվում:

Ազդեցությունը՝ այս մարզաձևը բարելավում է ճկունությունը, բայց անպայման կատարեք նախավարժանք խաղալուց առաջ: Թենիսը բարելավում է սրտի ռիթմի փոփոխություններին հարմարվելու ունակությունը, ամրացնում է իրանի վերին և ստորին հատվածի մկանները։

Պիլատես

Առաջին խումբ՝ շաբաթական 2-3 անգամ, 1 ժամ։

Երկրորդ խումբ՝ շաբաթական 2-3 անգամ, 45 րոպե։

Երրորդ խումբ՝ շաբաթական 2 անգամ, 30 րոպե։

Ազդեցությունը՝ բարձրացնում է մկանների դիմացկունությունը, մկանային խմբերն ամրապնդվում են դանդաղ, վերահսկվող շարժումներով:

Պարանով ցատկ

Առաջին խումբ՝ շաբաթական 2-3 անգամ, 10-20 րոպե։

Երկրորդ խումբ՝ շաբաթական 2 անգամ, 5-10 րոպե։

Երրորդ խումբ՝ խորհուրդ չի տրվում:

Ազդեցությունը՝ բարելավում է կապանների վիճակը՝ արյան շրջանառության և հյուսվածքների սնուցման ավելացման շնորհիվ: Տոնուսավորում է ոտքերի, որովայնի և ձեռքերի մկանները՝ չզրկելով նրանց առաձգականությունից։

 

Թեմայի մեջ

Գրադարան

Տեղեկատու

Ֆեյսբուքյան էջ