Սիրելի երիտասարդներ,
Նոր տարին բոլորիս համար ոչ միայն սպասված ու սիրված, այլև ամենահին տոներից է: Յուրաքանչյուր Ամանոր նոր մեկնարկի սկիզբ է ազդարարում, և այդ մեկնարկը թող բոլորիս համար լինի հաջողակ ու խոստումնալից:
Ամփոփելով 2022-ը` նոր հույսերով ու ակնկալիքներով ենք դիմավորում 2023-ը: Թող 2023-ին կրկնապատկվեն ձեռքբերումներն ու հաջողությունները, և իրականություն դառնան չիրականացված երազանքները:
Վերջին շրջանում մեզ պատուհասած փորձությունները մեզ մղում են՝ առավել քան երբևէ վերանայելու մեր արժեքները, տարբերակելու առաջնայինն ու անկարևորը, գնահատելու մեր աշխատանքի արդյունքներն ու բացթողումները: Մեր պետության հիմքերն ամուր են նաև կայուն կրթական համակարգով, զարգացած գիտությամբ, պահպանված ու պաշտպանված մշակութային կոթողներով:
Հավատում ու վստահ ենք, որ մեր երկրի լավ ապագան կախված է երիտասարդներից, և թող գալիք տարին հնարավորություններ ստեղծի ավելի շատ արարելու, ստեղծագործելու, աշխատելու, զարգանալու, ստեղծելու նոր հարթակներ, նոր գաղափարներ:
Նոր տարին նոր հույսերի ու ակնկալիքների տոն է: Մենք հավատում ենք, որ ամեն գալիք տարվա հետ կփոխվի նաև մեր կյանքը, այն կդառնա ավելի լավ ու բարեկեցիկ, ջերմությամբ ու բարությամբ կլցվեն մեր օջախները, ավելի կզորանա ու կբարգավաճի մեր հայրենիքը:
Թող անցնող տարվա հետ մոռանանք բոլոր դժվարությունները, հիվանդություններն ու դժբախտությունները։ Եվ թող բոլորի դեմքին իջնեն ժպիտներ, և այն պահպանվի ամբողջ տարվա ընթացքում։ Թող 2023-ին իրականանան բոլորիս ցանկություններն ու նախորդ տարիներին չիրականացած բոլոր իղձերը։ Հուսանք, որ 2023-ը կլինի հուսո, սիրո և ամենակարևորն է՝ խաղաղության տարի։
Շնորհավոր Ամանոր և Սուրբ Ծնունդ:
