Այսօր

«Եվրոպական կրթական հիմնադրամն» աջակցում է Հայաստանի ՄԿՈՒ բարեփոխումներին

  11 Փետրվար 2021  44 դիտում
«Եվրոպական կրթական հիմնադրամն» աջակցում է Հայաստանի ՄԿՈՒ բարեփոխումներին

Տեղի է ունեցել ՀՀ կրթության, գիտության, մշակույթի և սպորտի նախարարության ու «Եվրոպական կրթական հիմնադրամի» ներկայացուցիչների առցանց հանդիպումը, որի ընթացքում քննարկվել են նախնական և միջին մասնագիտական կրթության ոլորտում հետագա համագործակցության, մասնավորապես, աշխատանքի վրա հիմնված ուսուցման (ԱՀՈՒ), կրթության գործընթացի թվայնացման հնարավորությունների, որակի ապահովման համակարգի զարգացման, ինչպես նաև գերազանցության կենտրոնների հզորացման  վերաբերյալ հարցեր:

Ողջունելով հանդիպման մասնակիցներին՝ ԿԳՄՍ նախարարի տեղակալ Ժաննա Անդրեասյանը բարձր է գնահատել «Եվրոպական կրթական հիմնադրամի» ցուցաբերած աջակցությունը Հայաստանի մասնագիտական կրթության և ուսուցման (ՄԿՈՒ) բարեփոխումներին՝ ընդգծելով արդյունավետ համագործակցության ընդլայնման անհրաժեշտությունը:

«Պետք է բազմապատկենք մեր ջանքերը՝ այս ոլորտում ավելի շոշափելի և տեսանելի արդյունքների հասնելու համար և դրանք կառուցելով իրականացված աշխատանքի, փորձառության և արդյունքների վրա»,- նշել է փոխնախարարը՝ ընդգծելով ՄԿՈՒ ոլորտի նշանակությունը Հայաստանի սոցիալ-տնտեսական զարգացման գործում: Նա նաև անդրադարձել է Կրթության զարգացման ռազմավարությանը, որում հստակ միջոցառումներով և քայլերով ամրագրվում են ՄԿՈՒ ոլորտի բարեփոխումների ուղղություններն ու թիրախները: Այդ համատեքստում Ժաննա Անդրեասյանը կարևորել է Հայաստանի ՄԿՈՒ համակարգի համահունչ զարգացումն ու ինտեգրումը եվրոպական կրթական տարածքին և գործընթացներին:

ԿԳՄՍՆ նախնական/արհեստագործական և միջին մասնագիտական կրթության վարչության պետ Արտակ Աղբալյանն իր հերթին շնորհակալություն է հայտնել Եվրոպական կրթական հիմնադրամին՝ ավելի քան 10 տարի Հայաստանի ՄԿՈՒ համակարգի բարեփոխումներին աջակցելու համար: Աշխատանքի վրա հիմնված ուսուցման համատեքստում ներկայացվել է, որ արդեն իսկ մշակված է ԱՀՈՒ հայեցակարգը և դրա իրականացման ճանապարհային քարտեզը:

«2019 թվականին ՀՀ երեք քոլեջներում ներդրվել է գյուղատնտեսական երկու մասնագիտությունների գծով փորձնական ֆորմալ ծրագիր: Բացի դրանից՝ նախորդ տարի դոնոր կազմակերպությունների և ՀԿ-ների հետ արդյունավետ աշխատել ենք՝ ընդլայնելու ծրագրի աշխարհագրությունը և մասնագիտությունների ցանկը:  Աշխատանքի վրա հիմնված ուսուցման բաղադրիչը ներառել ենք նաև ոչ ֆորմալ կրթության մեջ: Մոտ ապագայում ևս 6-8 մասնագիտությունների գծով պատրաստ կլինեն 12 կարճաժամկետ ծրագրեր»,- նշել է Արտակ Աղբալյանը՝ հավելելով, որ առաջիկայում նախատեսվում է ՄԿՈՒ զարգացման ազգային խորհրդի նիստ, որի ընթացքում կքննարկվեն «Աշխատանքի վրա հիմնված ուսումնառությունը Հայաստանում. ՄԿՈՒ համակարգում պրակտիկայի բարելավում» և «Աշխատանքի վրա հիմնված ուսումնառության հայկական մոդելի՝ ՆՄԿՈՒ հաստատության կողմից առևտրային գործունեության իրականացվելիության գնահատում» հայեցակարգերի նախագծերը:

«Դրանք հանդիսանում են նաև ՀՀ կառավարության գործունեության ծրագրի բաղկացուցիչ մաս, և սահմանված բոլոր դրույթներն ու ճանապարհային քարտեզն առաջիկայում կբերվեն իրավական և փորձնական ծրագրերի ներդրման դաշտ»,- ընդգծել է վարչության պետը և հավելել, որ շուտով կամփոփվի նաև «Եվրոպական կրթական հիմնադրամի» ֆինանսավորմամբ իրականացվող թվայնացման հետազոտությունը:

Իր ելույթում Արտակ Աղբալյանն անդրադարձել է Թուրինյան գործընթացի 2018-2020 թթ. հայաստանյան զեկույցին, որն արդեն իսկ հրապարակել է «Եվրոպական կրթական հիմնադրամը»: ԵԿՀ փորձագետներն իրականացրել են նաև վերոնշյալ զեկույցի գնահատում, համաձայն որի՝ արձանագրվել են Հայաստանում իրականացվող ՄԿՈՒ բարեփոխումների դրական ընթացքն ու զարգացումները:  Արտակ Աղբալյանի խոսքով՝ զեկույցում բավականին մանրամասն անդրադարձ է կատարվել նաև աշխատանքի վրա հիմնված ուսուցմանը:

«Եվրոպական կրթական հիմնադրամի» հայաստանյան համակարգող Քրիստիանա Բուրզիոն իր հերթին վերահաստատել է ԵԿՀ աջակցությունը Հայաստանում ՄԿՈՒ բարեփոխումների գործընթացին: Նա ներկայացրել է 2021 թ. նախատեսվող միջոցառումները, որոնց թվում են՝ աշխատանքի վրա հիմնված ուսուցման ներդրմանն ուղղված աշխատանքները, ՄԿՈՒ ոլորտում ուսումնական գործընթացի թվայնացման, թվային հմտությունների և որակավորումների զարգացումը, որակի ապահովման համակարգերի բարելավումը: Նշվել է, որ ԵԿՀ նոր նախաձեռնությամբ կիրականացվի արհեստների քարտեզագրում, որի նպատակն է ուսումնասիրել արհեստների պահանջարկը և դրանց զարգացման հնարավորությունները: ԵԿՀ բոլոր նախաձեռնությունների և ծրագրերի շրջանակում մեծ դեր կհատկացվի նաև մասնակից երկրների միջև փորձի փոխանակման գործընթացին: Հանդիպման ընթացքում քննարկվել են նաև ՄԿՈՒ ոլորտում ֆինանսավորման նոր բանաձևի անհրաժեշտության, ինչպես նաև Հայաստանից արդեն իսկ ընտրված 5 գերազանցության կենտրոնների հետ համագործակցությանն առնչվող հարցերը:

Թեմայի մեջ

Տեղեկատու

Ֆեյսբուքյան էջ