Այսօր

Կարևորը նպատակ սահմանելն է, ամեն օր թեկուզ մեկ քայլով դրան մոտենալը․ Մելիք Մկրտչյան

  24 Փետրվար 2021  525 դիտում
Կարևորը նպատակ սահմանելն է, ամեն օր թեկուզ մեկ քայլով դրան մոտենալը․ Մելիք Մկրտչյան

Վերջերս ՀՀ կրթության, գիտության, մշակույթի և սպորտի նախարարությունն ամփոփեց «Տարվա լավագույնները» մրցույթի արդյունքները։ «Հանրակրթական ուսումնական հաստատության ուսուցչական լավագույն ծրագիր կամ նախաձեռնություն» անվանակարգում հաղթող ճանաչվեց 33 ծրագիր: Լավագույն տասնյակում էր նաև Մելիք Մկրտչյանի «Հայ մշակույթի պատմություն» հեռավար դասընթացի ստեղծում» ծրագիրը։ Erit.am-ի հետ զրույցում Մելիք Մկրտչյանը պատմել է հաղթող ծրագրի, ինչպես նաև ուսուցչի մասնագիտությունն ընտրելու, «Դասավանդի՛ր, Հայաստան» կրթական հիմնադրամի հետ անցած ճանապարհի, հաղթահարած դժվարությունների և ձեռքբերումների մասին։

-Ե՞րբ և ինչպե՞ս պատմության ֆակուլտետի շրջանավարտ Մելիք Մկրտչյանը դարձավ ընկեր Մկրտչյան։

-Ներկա պահին դեռևս ԵՊՀ պատմության ֆակուլտետի ասպիրանտ եմ, կարելի է ասել` միշտ եմ սովորում այս ֆակուլտետում, այն շատ հոգեհարազատ է դարձել:

Ամեն ինչ սկսվեց 2017 թ. սեպտեմբերի 1-ից, երբ «Դասավանդի՛ր, Հայաստան» ծրագրի շրջանակներում ինձ գործուղեցին Մուսալեռի Ֆրանց Վերֆելի անվան միջնակարգ դպրոց՝ որպես պատմության ուսուցիչ: Այդ պահից սկսած իմ կյանքն ամբողջովին փոխվեց․ սկսվեցին ընկեր Մկրտչյանի հետաքրքիր, բովանդակալից և գերհագեցած օրերը: Հետաքրքիրն այն է, որ մտնում ես մի միջավայր, որտեղ դու ընդհանրապես փորձ չունես, բայց «զինված ես» նորանոր մանկավարժական հմտություններով ու մեթոդներով, ինչի շնորհիվ էլ դառնում ես աշակերտներիդ սիրելի ընկեր Մկրտչյանը: