Այսօր

Խորհուրդներ, որոնք կօգնեն արագ և հանգիստ քնել

  19 Ապրիլ 2021  79 դիտում
Խորհուրդներ, որոնք կօգնեն արագ և հանգիստ քնել

Հոգնածություն, վատ տրամադրություն, դյուրագրգիռություն, տկրամտություն, հիշողության կորուստ… Վատ քնի հետևանքները կարելի է անվերջ թվարկել: Գիտակցելով քնի կարևորությունը՝ շատերս վաղ են պառկում, ինչը սակայն ոչ միշտ է արդյունք երաշխավորում: Առաջարկում ենք մի քանի խորհուրդ, որոնք կօգնեն անկողնում անվերջ շուռումուռ գալու փոխարեն արագ և հանգիստ քնել: Եթե այս խորհուրդները ևս անօգուտ լինեն՝ դիմեք համապատասխան բժշկական օգնության:

60 րոպե հանգիստ

Մենք ամբողջ օրը շարժման մեջ ենք, կուտակում ենք ֆիզիկական և մտավոր լարվածություն: Որքան էլ տարօրինակ թվա՝ ակտիվ աշխատանքային օրվանից հետո անմիջապես քնի ռեժիմի անցնելը բավականին կոպիտ վերաբերմունք է սեփական ուղեղի և մարմնի նկատմամբ: Առանց օրգանիզմը հանգստի ռեժիմի բերելու քնելը սխալ է: Այնպես որ՝ քնելուց 1 ժամ առաջ փորձեք որևէ ֆիզիկական և մտավոր աշխատանք չկատարել: Մի կողմ թողեք հոգսերը, թուլացեք, մի քանի էջ գիրք կարդացեք, փորձեք մեդիտացիայի որևէ պարզ տեխնիկա, արեք այն ամենը, ինչը ձեր օրգանիզմը փոքր-ինչ կթուլացնի: 

Քանի քունը վրա չի հասել...

Առանց քնի պահանջ զգալու անմիջապես պառկելու որոշումն այնքան էլ ճիշտ է՝ հատկապես եթե լի եք էներգիայով: Եթե ո՛չ մարմինը, ո՛չ ուղեղը պատրաստ չեն քնի, իզուր մի պառկեք: Անկողին մտեք, երբ իսկապես զգում եք, որ քունը վրա է հասել:

Տաք ցնցուղ 

Առաջին հայացքից այս միջոցը կարող է անմիտ թվալ, բայց բժիշկների հավաստմամբ՝ այն իսկապես օգնում է հանգստացնել մարմինն ու տրամադրել քնի: Տաք ցնցուղը դանդաղեցնում սրտի զարկերը, մարսողությունը և նյութափոխանակության այլ գործընթացներ՝  առաջացնելով քնելու ցանկություն:

Շնչառական վարժություններ

Շուռումուռ գալով՝ մենք փորձում ենք հարմար դիրք ընտրել, բայց մոռանում ենք շնչառության մասին, ինչը, հավատացեք, ավելի կարևոր է: Գիտակցաբար փոխելով շնչելու և արտաշնչելու տևողությունը՝ դուք կարող եք փոխել սրտի զարկերի ռիթմը, արյան շրջանառությունը՝ օրգանիզմին տրամադրելով քնի: Շատ մասնագետներ խորհուրդ են տալիս 3-5 վայրկյան խորը շունչ քաշել՝ զգալով քթերից դեպի թոքեր գնացող օդը, ապա 2 անգամ դանդաղ արտաշնչել բերանով: Կարող եք օգտագործել նաև «4-7-8» տեխնիկան՝ շունչ եք քաշում 4 վայրկյան, շունչ եք պահում 7 վայրկյան, ապա արտաշնչում եք 8 վայրկյան: 

Կառավարեք մտքերը

Փորձեք ցրել առօրյա հոգսերի, խնդիրների մասին մտքերը, որոնք թույլ չեն տալիս քնել: Ամենատարածված տարբերակը «գառնուկներին հաշվելն» է, իսկ մի փոքր ավելի բարդ, բայց արդյունավետ միջոց մեդիտացիան է: Պառկեք հարմար դիրքով, փակեք աչքերը, թուլացրեք մարմինը և սկսեք պատկերացնել այն ամենը, ինչ ձեզ հանգստացնում է: Օրինակ՝ դա կարող է լինել անտառային միջավայրում տնակ, որտեղ եղել եք փոքր ժամանակ: Պատկերացրեք և փորձեք զգալ թարմ օդը, տերևների խշխշոցը... Կարևոր է՝ պատկերը լինի հենց ձեզ վերաբերող և կապված հանգստացնող էմոցիոնալ վիճակի հետ: Այդպես աստիճանաբար կցրեք շեղող մտքերը և օրգանիզմը կտրամադրեք քնի: 

Թեմայի մեջ

Տեղեկատու

Ֆեյսբուքյան էջ